اک پیغام

تنظیماں ملگرؤں خواہش تل مہ تنظیماں  بارہ مہ کم لکھ بِگ منئیں غرضی تُھو۔   آئ۔ پی۔ این    لئیکھ لکھ لیکن گھئیں ہُوئیں والا  مقامی غیر سیساسی، غیر سرکاری تے غیر مالی فیدہ ہرئیں والا اک سماجی تنظیم تھو چہ تسئیں بنیاد سن  2012 منز اک خاص  مقصد تے منشور ذھنہ منز څھا څھالس۔ اس تنظیماں قیام پئیتوں څئ  کالوں محنت تے تحقیق شامل تُھو چہ سیوں وجنہ آز اُو تنظیم سئیں مقصدؤں حصولاں کراں کام کرہ شت۔ ہر انسان تے ہر پاکستانی مخصوص بنیسادی حقوق لرانت چہ سیوں ذکر ہر ملکاں آئین تے قانون منز کرزئیل ہُونت۔ پاکستاں آئین منز دیزئیل حقوقوں حصول چے سئیں زباں حوالہ ہِن ہواں یا مُت بنیادی حقوقوں حوالہ ہن سیوں کراں اک منظم کوشش کروں اس تنظیماں بنیادی کام تے فرض تُھو۔ کوستاں ہر حوالہ ہن زندگئیں بنیادی سہولتوں نہ  خالی  تے محروم تُھو ہاں خلکوں گے تاں حقوقوں بارہ مہ آگاہی تے سئیں حاصل کرئیں کراں وسائیل تے پندہ ھُم نئ تھی ہاں ڜس وجنہ اس تنظیماں قیام عممل منز آڅھے تے چہ خلکوں مہ نہ صرف اس حوالہ ہِن  آگاہی پیدا ہُوں بلکہ قانونئیں پاسداری تے عملداری مِشر مِشر تاں حقوقوں حصولاں کراں اک قانونی پاند مثبت طئیرقہ ہِن شروع کیراں۔  مہ تمام کوستئیں  جھاوں کراں اپیل کرات چہ تُس بُٹ اس تنظیماں مرستہ کرے، اس استعمال کرے تئیں علاقئیں تے تاں خلکوں ہر لحاظ ہِن خدمت تے بہبوداں کراں مُوں ٹُھو ایگلے کام کری ہاں اک ذمہ داری شہری تے کوستئیں ہُوئیں حق ادا کرئی۔ مہ آخر مہ اللہ تبارک وتعالیٰ نہ سوال کرات چہ سو قومئیں خدمتئیں کراں زئیں نیتہ صاف کرے، اخلاص نصیب کرے آں تئیں مدد تے نصرت شامل حال کرے۔ آمین